Şəhid Polkovnik-Leytenant Vidadi Xəlilovun ad günü qeyd edildi
Vətən müharibəsində şəhidlik zirvəsinə yüksələn Polkovnik-Leytenant Vidadi Xəlilovun ad günü məzarı önündə qeyd olundu.
Mərasimdə rayon İcra Hakimiyyətinin başçısının müavini Zivər Zeynalova, RİH başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin əməkdaşları, Yeni Azərbaycan Partiyası rayon təşkilatının sədri Sahib Şükürov, ictimaiyyət nümayəndələri, şəhid ailələrin üzvləri iştirak edirdilər.
Göyçay şəhər Şəhidlər Xiyabanında şəhidin əziz xatirəsi ehtiramla yad olunub, məzarı üzərinə gül dəstələri düzülüb.
Mərasimdə çıxış edənlər şəhidin ailəsinə baş sağlığı verərək, dövlətimiz tərəfindən Şəhid Polkovnik-Leytenanta verilən təltiflərdən, qayğı və diqqətdən bəhs edib. Şəhid Vidadi Xəlilovun keçdiyi qısa və mənalı həyat yolundan söz açılıb, vətənimizin bütövlüyü uğrunda mübarizədə canlarından keçmiş şəhidlərin əziz xatirəsini daim uca tutmağı, tarix yazan qəhrəman şəhidlərin and yerimizə, ziyarət məkanımıza çevriləcəyi bildirilib.
Şəhidin ailə üzvləri göstərilən diqqət və qayğıya görə Prezident cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirmişlər.
Xatırladaq ki, şəhid Vidadi Xəlilov 16 iyul 1982-ci il tarixdə Göyçay şəhərində anadan olmuşdur. 1999-cu ildə Heydər Əliyev adına Azərbaycan Ali Hərbi Akademiyaya daxil olmuş, 2003-cü ildən zabit kimi N saylı hərbi hissədə xidmətini davam etdirmişdir. 30 oktyabr 2020-ci il tarixdə Laçın istiqamətində gedən döyüşlərdə qəhramancasına şəhid olmuşdur. Azərbaycan Respublikası Prezidentinin sərəncamı ilə "Azərbaycan Bayrağı" ordeni və "Vətən uğrunda", "Cəbrayılın azad olunmasına görə", "Qubadlının azad, olunmasına görə", “Laçının azad olunmasına görə” və "Hərbi xidmətlərə görə" medalları ilə təltif edilmişdir.
