Rayon rəhbərliyinin şəhid ailələrinə ziyarəti davam edir
Torpaqlarımızın işğaldan azad edilməsi, ölkəmizin ərazi bütövlüyünün bərpa olunması uğrunda mübarizədə böyük rəşadət və igidlik göstərərək şəhidlik zirvəsinə yüksəlmiş Göyçaylı qəhrəmanlarımızın xatirəsi ehtiramla anılır.
Sentyabrın 20-də Göyçay Rayon İcra Hakimiyyətinin başçısı Natiq Ağayev 44 günlük Vətən Müharibəsi şəhidlərinin anım günü ərəfəsində şəhidlər Həmidov Rəhim Ehdiram oğlu, Abdullayev Səməd Sədiyar oğlu və Əzizov Şəmistan İlyas oğlunun ailə üzvləri ilə görüşüb.
Görüşdə rayon Polis Şöbəsinin rəisi, rayon icra hakimiyyəti başçısı aparatının məsul şəxsləri, YAP Göyçay rayon təşkilatının sədri və Göyçay Rayon İcra Hakimiyyəti yanında İctimai Şuranın üzvləri də iştirak edib.
Şəhid valideynləri ilə görüşdə qəhrəmanlarımızın şərəfli döyüş yolundan danışılaraq xatirələri anılıb.
Göyçay Rayon İcra Hakimiyyətinin başçısı Natiq Ağayev görüşdə Azərbaycan xalqının qüruru, fəxri olan şəhidlərimizin xatirəsinin bundan sonra da daim əziz tutulacağını və dövlətimizin hər zaman şəhidlik zirvəsinə ucalan igidlərimizin ailələrinin yanında olacağını qeyd edərək bizə zəfər sevinci, qalibiyyət qüruru bəxş edən şəhidlərin xatirəsinin yaddaşlarda əbədi yaşayacağını bildirib.
Rayon rəhbəri şəhid ailələrinin qayğıları ilə maraqlanıb, onların qaldırdıqları məsələləri nəzarətdə saxlayacağını və həlli məqsədilə müvafiq tədbirlərin görüləcəyini bildirib.
Şəhid ailələri onlara göstərilən diqqət və qayğıya görə Azərbaycan Respublikasının Prezidenti Ali Baş Komandan cənab İlham Əliyevə və rayon rəhbərliyinə öz minnətdarlıqlarını bildiriblər.
