Göyçayda şəhid ailəsinə ev tikilir
Göyçay rayonunda şəhid ailələrinə, müharibə əlillərinə və iştirakçılara daim diqqət, qayğı ilə yanaşılır, rayon icra hakimiyyəti həmin ailələrin problemləri ilə mütəmadi maraqlanır, qaldırdıqları məsələlərin həlli ilə bağlı müvafiq tədbirlər həyata keçirir.
Göyçay şəhəri Zakir Nəcəfov küçəsində yaşayan birinci Qarabağ müharibəsində ölkəmizin ərazi bütövlüyünün təmin olunması uğrunda gedən döyüşlərdə qəhrəmancasına şəhid olmuş Anar Niyaz oğlu Zeynalovun anası Fəridə Zeynalovanın 2022-ci il avqustun 13-də yaşadıqları evin yanması ilə bağlı Rayon İcra Hakimiyyətinə etdiyi müraciət əsasında yeni fərdi yaşayış evinin tikilməsinə başlanılıb. Şəhidimizin ailə üzvləri üçün yeni 150 kv-lıq 5 otaqdan ibarət evin tikilərək ailənin istifadəsinə verilməsi nəzərdə tutulub.
Şəhid anası Fəridə Zeynalova fərdi yaşayış evinin tikilməsinə və onlara göstərilən qayğıya görə Prezident İlham Əliyevə, Birinci vitse-prezident Mehriban xanım Əliyevaya və Göyçay Rayon İcra Hakimiyyətinə təşəkkürünü bildirib.
Qeyd edək ki, şəhid Zeynalov Anar Niyaz oğlu 1972-ci ildə Göyçay rayonunda anadan olub. Orta təhsilini Göyçay şəhər Ziya Bünyadov adına 3 saylı tam orta məktəbdə alıb.
Daha sonra təhsilini Göyçay 58 saylı Texniki Peşə Məktəbində davam etdirib. Anar Zeynalov 24 avqust 1992-ci ildə Zəngilan rayonunun Qazançı kəndi uğrunda gedən döyüşlərdə şəhid olub və Göyçay şəhər Şəhidlər Xiyabanında dəfn edilib.
