Göyçayda “8 Noyabr-Zəfər Günü” münasibəti ilə “Zəfər tariximiz” adlı tədbir keçirilib
06 noyabr 2024-cü il tarixində “8 Noyabr-Zəfər Günü” münasibəti ilə Göyçay Gənclər evi, Göyçay rayonu üzrə gənclər və idman sektoru və Uşaq Gənclər İnkişaf Mərkəzinin birgə təşkilatçılığı ilə “Zəfər tariximiz” adlı tədbir keçirilib.
Azərbaycan Respublikasının dövlət himninin səslənməsi ilə başlanan tədbirdə torpaqlarımızın bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Tədbirdə çıxış edən Göyçay Rayon İcra Hakimiyyətinin başçısının müavini Zivər Zeynalova 44 günlük Vətən müharibəsində qazanılan tarixi qələbə və “8 noyabr - Zəfər günü” münasibətilə tədbir iştirakçılarını təbrik edib və bildirib ki, Azərbaycan Respublikası Prezidenti, Müzəffər Ali Baş Komandan cənab İlham Əliyevin rəhbərliyi ilə Vətən Müharibəsində rəşadətli ordumuz tərəfindən torpaqlarımızın yağı düşməndən azad edilməsi ilə Azərbaycan tarixinə yazılan möhtəşəm Zəfər Bayramını bu gün bütün dünya azərbaycanlıları tərəfindən qürur hissi ilə qeyd edilir.
Sonra çıxış edən Vətən Müharibəsi şəhidi Xəyyam Hüseynin atası Hüseynağa Hüseynov və Vətən Müharibəsi iştirakçısı Fazil Mehdiyev ordumuzun gücü ilə ərazi bütövlüyümüzün tam təmin olunmasından söz açıblar və dövlət tərəfindən onlara göstərilən diqqətə görə ölkə Prezidentinə öz minnətdarlıqlarını bildiriblər.
Gənclər şanlı zəfərimiz haqqında şeirlər və ifalar səsləndirib, rəqs nümunələri ilə çıxış ediblər.
