Göyçayda 8 mart - Beynəlxalq Qadınlar günü münasibətilə şəhid anaları və şəhidlərin həyat yoldaşlarının iştirakı ilə tədbir keçirildi
07 mart 2023-cü il tarixdə Göyçay Rayon İcra Hakimiyyətinin inzibati binasında 8 mart - Beynəlxalq Qadınlar günü münasibətilə şəhid anaları və şəhidlərin həyat yoldaşlarının iştirakı ilə tədbir keçirildi.
Tədbirdə Azərbaycanın ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edildi.
Göyçay Rayon İcra Hakimiyyətinin başçısı Natiq Ağayev tədbiri giriş sözü ilə açaraq şəhid analarını və şəhidlərin həyat yoldaşlarını 8 mart - Beynəlxalq Qadınlar Günü münasibətilə təbrik etdi.
Bildirdi ki, Azərbaycan qadınları milli varlığımızı özündə əks etdirmiş, mədəni dəyərlərimizin əsrlərdən bəri qorunub saxlanmasında misilsiz xidmətlər göstərmiş və həmişə cəmiyyətimizin etibarlı mənəvi dayağı olmuş, ölkəmizin sosial-iqtisadi, mədəni və elmi potensialının artırılması üçün qüvvələrini əsirgəməmişlər. Azərbaycan qadını mərdlik və mətanət nümayiş etdirərək, dualarla cəbhəyə göndərib qələbə xəbəri ilə yolunu gözlədikləri və yurdumuzun hər qarışını canından əziz bilən bir nəsil yetişdirmişdir. Dövlətçiliyimizə ən böyük töhfə, heç şübhəsiz ki, 44 günlük Vətən müharibəsindəki qəhrəmanlığı və şücaəti ilə əsla yaddaşlardan silinməyəcək gənc nəsli məhz Siz analar böyüdüb tərbiyə etmisiniz. Qarabağın Ana Vətənə qovuşmasında və məğrur xalqımıza hüdudsuz zəfər sevincinin yaşadılmasında sizin tərbiyə etdiyiniz vətənpərvər oğullarınızın müstəsna payı vardır.
Sonra rayon İcra Hakimiyyəti başçısının müavini Zivər Zeynalova Azərbaycan Respublikasının Prezidentinin Azərbaycan qadınlarına ünvanladığı təbrik məktubunu tədbir iştirakçılarının diqqətinə çatdırdı.
Tədbirdə şəhid anaları Adilə Eminova, Əminə Xəlilova, Göyçay Dövlət İdarəetmə və Texnologiya Kollecinin müəllimi Nərmin Abışova, Rayon Mərkəzi Xəstəxanasının psixoloqu Dilarə Bayramova, rayon ziyalıları adından respublikanın əməkdar müəllimi Adil Məmmədov çıxış etmişlər.
Daha sonra rayon məktəblilərin hazırladıqları kompozisiya nümayiş olunmuşdur.
Sonda tədbir iştirakçıları ilə xatirə şəkli çəkilib.
