Göyçayda 5 oktyabr - Beynəlxalq Müəllimlər Günü münasibətilə tədbir keçirilib
Göyçay şəhər Heydər Əliyev Mərkəzində 5 oktyabr - Beynəlxalq Müəllimlər Gününə həsr olunan tədbir keçirilib.
Tədbirdə Mərkəzi Aran Regional Təhsil İdarəsinin müdiri Elçin Kərimov, Göyçay Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Zivər Zeynalova, Mərkəzi Aran Regional Mədəniyyət İdarəsinin müdiri Aydın Bəşirov, Mərkəzi Aran Regional Gənclər və İdman İdarəsinin rəisi Azad Gözəlov, idarənin struktur bölmə rəhbərləri və əməkdaşları, ümumi təhsil müəssisələrinin direktorları və müəllimlər iştirak ediblər.
Tədbirdən öncə qonaqlar ümummilli lider Heydər Əliyevin Mərkəzi qarşısında ucaldılan abidəni ehtiramla yad edib, məzarı önünə gül dəstələri düzüblər.
Daha sonra Mərkəzin girişində məktəblilərin rəsm-əl işlərindən ibarət sərgiyə baxış keçirilib.
Tədbir Azərbaycan Respublikasının Dövlət Himninin səsləndirilməsi və Vətən uğrunda canlarını qurban vermiş şəhidlərin əziz xatirəsinin bir dəqiqəlik sükutla yad edilməsi ilə başlanıb.
Tədbiri giriş sözləri ilə açan idarə müdiri Elçin Kərimov regionun bütün müəllimlərini əlamətdar gün münasibətilə təbrik edib və onlara ən xoş arzularını çatdırıb. İdarə müdiri müəllimlərin sosial rifahının yaxşılaşdırılması istiqamətində ölkə Prezidenti İlham Əliyev tərəfindən uğurlu addımların atıldığını qeyd edib, eləcə də təhsilin inkişafı istiqamətində görülən mühüm işlər barədə danışıb.
Çıxış edən Göyçay Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Zivər Zeynalova ölkəmizin gələcəyi və inkişafı naminə vətənpərvər, layiqli vətəndaş yetişdirən müəllimlərə öz dərin təşəkkürünü bildirib və onlara fəaliyyətlərində müvəffəqiyyətlər arzulayıb.
Daha sonra çıxış edənlər müəllimlərə göstərilən diqqət və qayğıya görə öz dərin təşəkkürlərini bildiriblər.
Tədbirdə şagirdlərin ifasında ədəbi-bədii kompozisiyalar səsləndirilib, həmçinin videoçarx nümayiş olunub.
Mərkəzi Aran Regional Təhsil İdarəsinin tabeliyində olan ümumi təhsil müəssisələrində müəllim olaraq çalışan şəhid ana və ataları təltifə layiq görülüb.
Həmçinin regionun bir qrup təhsil işçisi gənc nəslin təlim-tərbiyəsi sahəsində səmərəli pedaqoji fəaliyyətlərinə görə və 5 oktyabr - Beynəlxalq Müəllimlər Günü münasibətilə Fəxri Fərman təltif olunub.
Sonda xatirə şəkli çəkdirilib.
