Göyçay rayonunda güclü külək və yağış fəsadlar törədib
Göyçay rayonu ərazisində 31 may 2023-cü il tarixdə saat 19:00 radələrində baş vermiş təbii fəlakət - güclü külək və yağış nəticəsində şəhərin Natəvan küçəsində yerləşən beşmərtəbəli yaşayış binasının 1260 kvadratmetr dam örtüyü dağılmışdır.
Şəhərinin bir çox küçələrində, eləcə də kəndlərdə güclü külək yol kənarlarındakı ağacları, vətəndaşalara məxsus tikililərin dam örtüyünü, istixanaları aşırmış, yağan yağış daşaraq küçələri, fərdi yaşayış evlərini, həyətyanı sahələri basmış, elektrik enerjisinin və təbii qazın verilişində fasilələr yaranmışdır.
Baş vermiş hadisənin operativ şəkildə aradan qaldırılması ilə əlaqədar Göyçay Rayon İcra Hakimiyyətinin rəhbərliyi ilə aidiyyəti təşkilatlar tərəfindən zəruri tədbirlər həyata keçirilir, qırılan ağaclar təmizlənərək yol kənarlarından daşınır, elektrik verilişində yaranan nasazlıqlar aradan qaldırılır.
Təbii fəlakət nəticəsində 2 nəfər xəsarət almışdır, ölən yoxdur.
