Göyçay rayonun Cırqurd kəndinin mərkəzi yolu əsaslı təmir olunub
Göyçay rayonunda yol infrastrukturunun yaxşılaşdırılması istiqamətində aparılan işlər çərçivəsində kənd yollarında əsaslı təmir işləri görülür. Vətəndaşların rahat gediş-gəlişini təmin etmək məqsədilə uzunluğu 1 km olan Göyçay rayonunun Cırqurd kəndinin mərkəzi yolu əsaslı təmir olunub.
Uzun müddət idi ki, əsaslı şəkildə təmir olunmayan yol yararsız vəziyyətə düşmüşdür. Yolun bu vəziyyətdə olması həm avtonəqliyyat vasitələrinin, həm də piyadaların gediş-gəlişində xüsusən payız-qış aylarında müəyyən çətinliklər yaradırdı. Artıq bu problem köklü şəkildə həllini tapıb.
Belə ki, əsaslı təmir-tikinti işləri “17 Nömrəli Yol İstismarı” MMC tərəfindən Cırqurd kəndinin mərkəzi yolu texnoloji ardıcıllığa riayət olunmaqla və yüksək keyfiyyətlə aparılıb.
Kəndin mərkəzi yoluna yeni asfalt örtüyünün vurulmasına görə kənd bələdiyyəsi və sakinlər ölkə Prezidentinə və rayon rəhbərliyinə təşəkkürlərini bildiriblər.
Qeyd edək ki, hazırda Azərbaycan Respublikası Prezidentinin 25 dekabr 2023-cü il tarixli Sərəncamı ilə Göyçay rayonunun Potu‒Ulaşlı Şıxlı‒Üngütlü‒Çərəkə‒Çərəcə‒Şıxlar‒Xəlitli‒Yeniarx‒Hacıağabəyli avtomobil yolunun əsaslı təmiri işləri aparılır.
