Birinci Qarabağ müharibəsində itkin düşmüş və şəxsiyyəti müəyyənləşdirilən şəhid Soltanov Səbuhi Sabir oğlu torpağa tapşırılıb

24 may 2024-cü il tarixdə Birinci Qarabağ müharibəsində itkin düşmüş və şəxsiyyəti müəyyənləşdirilən şəhidlərdən olan Soltanov Səbuhi Sabir oğlu Göyçay Şəhər Şəhidlər Xiyabanında dəfn edilib.

Şəhidin vida mərasimində Göyçay Rayon İcra Hakimiyyətinin başçısı Natiq Ağayev, hüquq-mühafizə orqanlarının rəhbərləri, idarə, müəssisə və təşkilatların kollektivləri, təhsil, səhiyyə, mədəniyyət işçiləri, rayon ictimaiyyətinin nümayəndələri, şəhid ailələri, Vətən müharibəsi iştirakçıları və əlilləri, rayon sakinləri iştirak ediblər.

Şəhid Soltanov Səbuhi Sabir oğlunun nəşi Göyçayda izdihamla qarşılanaraq cənazə namazı qılınıb, şəhidlərimizin ruhuna dualar oxunub.

Cənazə namazından sonra Müdafiə Nazirliyinin təşkilatçılığı ilə yaylım atəşi və orkestrın ifasında Azərbaycan Respublikasının Dövlət Himninin sədaları altında şəhid Göyçay şəhər Şəhidlər Xiyabanında torpağa tapşırılıb, “Şəhidlər ölməz, Vətən bölünməz” şüarları səsləndirilib, məzarı üstünə əklil və gül dəstələri düzülüb.

Sonra şəhidin tabutuna bükülmüş Azərbaycanın üçrəngli bayrağı rayon icra hakimiyyətinin başçısı tərəfindən şəhidin anasına təqdim edilib.

Rayon İcra Hakimiyyətinin başçısı qeyd edib ki, bu gün dini adət-ənənələrimizə uyğun dəfn olunan şəhidlərimizin ruhları şaddır, çünki canlarını qurban etdikləri vətən torpaqları dörd ilə yaxındır ki, işğaldan azad olunub və artıq Azərbaycanda Zəfər təntənəsi yaşanır. Şəhid Səbuhi Soltanov vətənpərvər ruhda böyüdüyü öz ata-baba yurdunda torpağa tapşırılır.

Qeyd edək ki, şəhid Soltanov Səbuhi Sabir oğlu 21 may 1967-ci ildə Göyçay şəhərində anadan olub. 21 iyun 1988-ci ilədək hərbi xidmətdə  olmuş,  20 avqust 1993-cü ildə Səfərbərlik üzrə xidmətə cəlb edilmişdir. 22 yanvar 1994-cü ildə Kəlbəcər rayonunun Murovdağ istiqamətində gedən döyüşlərdə iştirak edərək itkin düşmüşdür.