Göyçayda TQDK-nın regional bölməsinin inzibati binasının açılışı olmuşdur
İyunun 5-də Tələbə Qəbulu üzrə Dövlət Komissiyasının (TQDK) Göyçay şəhərində yerləşən regional bölməsinin inzibati binasının açılışı olmuşdur. Mərasimdə TQDK sədri Məleykə Abbaszadə, Göyçay rayon İcra Hakimiyyətininbaşçısı Mənsur Məmmədov, rayon ictimayyətinin nümayəndələri iştirak etmişlər. Binanın istifadəyə verilməsini bildirən rəmzi qırmızı lent kəsildikdən sonra qonaqlar orada yaradılmış şəraitlə tanış olmuşlar. Binada bölmənin fəaliyyətinin səmərəli təşkili üçün müasir standartlara cavab verən şərait yaradılmış, otaqlar lazımi inventarlar, texniki, texnoloji və metodiki vastələrlə təchiz olunmuşdur.
TQDK sədri binanın konfrans zalında Göyçay və ətraf rayonların pedaqoji ictimaiyyətinin nümayəndələri ilə görüş keçirmişdir. M.Abbaszadə Nazirlər Kabinetinin müvafiq qərarı ilə 2012-ci ildə komissiyanın 3 yeni regional bölməsinin yaradıldığını xatırlatmış, bununla da TQDK-nın regional bölmələrinin sayının 8-ə çatdığını bildirmişdir. Cari ildə bütün ixtisas qrupları üzrə ali təhsil müəssisələrinə qəbul imtahanlarının həmin regional bölmələrin yerləşdiyi şəhərlərdə, o cümlədən Göyçayda keçiriləcəyi qeyd olunmuşdur. Bununla da regionlarda yaşayan abituriyentlər daha yaxın mərkəzlərdə imtahan verməklə maddi resurslarına, vaxtlarına və enerjilərinə qənaət edəcəklər. TQDK sədri Məleykə Abbaszadə psixoloji baxımdan da bunun əhəmiyyətli olduğunu vurğulamışdır.
Komissiya sədri bu zonada yaşayan və fəaliyyət göstərən müəllimlərin, ekspertlərin, ümumilikdə pedaqoji ictimaiyyətin qəbul imtahanlarına dair materialların hazırlanmasında, qəbul proqramlarının müzakirələrində, dərsliklərin monitorinqi və digər elmi-metodiki proseslərdə daha fəal iştirakını arzu etdiyini bildirmişdir. O, buna görə də onları regional bölmə ilə daha sıx əməkdaşlığa dəvət etmişdir. M.Abbaszadə komissiya tərəfindən təşkil edilən elmi-metodiki seminarların paralel olaraq regional bölmələrdə də aparıldığını və TQDK-nın mərkəzi binası ilə video bağlantı əsasında müzakirələr təşkil olunduğu vurğulamışdır. Bu prosesdə də region müəllimlərinin iştrakının vacib olduğu qeyd olunmuşdur. Tədbirdə TQDK sədri görüş iştirakçılarını maraqlandıran sualları cavablandırmışdır.
