Şəhid Ayaz Əhmədovun ad günündə xatirə bulağının açılışı oldu

 Göyçay rayonunun İkinci Ərəbcəbirli kəndində 44 günlük Vətən müharibəsi zamanı Şəhidlik zirvəsinə ucalan Əhmədov Ayaz Elson oğlunun ad günü münasibəti ilə xatirəsinə inşa edilən bulağın açılış mərasimi keçirilmişdir.
  Əvvəlcə şəhidin məzarı ziyarət olunaraq üzərinə gül-çiçək dəstələri düzülmüş, xatirəsi etiramla yad edilmişdir.
  Bulağın açılış mərasimində rayon İcra Hakimiyyətinin başçısı səlahiyyətlərini müvəqqəti icra edən İkram Vəliyev, rayon İcra Hakimiyyətinin başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin əməkdaşları, kənd ağsaqqalları, gənclər, sakinlər, şəhidin yaxınları iştirak etmişlər.
Xatirə bulağının açılışında Vətən müharibəsində göstərdiyi qəhrəmanlıqlardan söz açılmış, ölkəmizin, o cümlədən göyçaylı müharibə iştirakçılarının qəhrəmanlığından danışılmışdır.
  Rayon İcra Hakimiyyətinin başçısı səlahiyyətlərini müvəqqəti icra edən İkram Vəliyev çıxış edərək Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi ilə Müzəffər Ordumuzun qısa müddətdə Vətən müharibəsində qazandığı tarixi qələbədən söz açmışdır.
  Şəhid Ayaz Əhmədov 04.03.2000-ci il tarixdə Göyçay rayonu İkinci Ərəbcəbirli  kəndində anadan olmuşdur. 21 sentyabr 2020-ci il tarixdə hərbi  təlimlərə cəlb edilmiş, 07 oktyabr 2020-ci il tarixdə Suqovuşan istiqamətində gedən döyüşlərdə qəhramancasına şəhid olmuşdur. Ölümündən sonra Azərbaycan Respublikası Prezdentinin  sərəncamı ilə “Vətən uğrunda”, “Suqovuşanın azad olunmasına görə” və “İgidliyə görə” medalları ilə təltif edilmişdir.
Şəhidin ailə üzvləri göstərilən diqqət və qayğıdan razı qaldıqlarını bildirərək ölkə Prezidenti, Ali Baş Komandan cənab İlham Əliyevə minnətdarlıqlarını ifadə etmişlər.