Göyçay rayonunda Ulu Öndər Heydər Əliyevin anadan olmasının 96-cı ildönümü qeyd olunub
Ümummilli Lider Heydər Əliyevin anadan olmasının 96-ci ildönümünə həsr olunmuş elmi-praktik konfransda iştirak edən Göyçay rayon İcra Hakimiyyətinin başçısı, İcra Hakimiyyəti aparatının məsul işçiləri, Dini Qurumlarla İş Üzrə Dövlət Komitəsinin Regional Şöbəsinin müdiri, hüquq mühafizə orqanlarının rəhbərləri, idarə, müəssisə və təşkilatların kollektivləri, rayon ictimaiyyətinin nümayəndələri əvvəlcə Ulu Öndərin abidəsi önünə gül-çiçək dəstələri düzərək xatirəsini ehtiramla yad etdilər.
Göyçay şəhəri “Şah” şadlıq sarayında Dövlət Himninin səslənməsi ilə başlanan konfransı Göyçay rayon İcra Hakimiyyətinin başçısı cənab Mehdi Səlimzadə açıq elan edərək dövlətimizin bu günkü müstəqil, güclü dövlətə çevrilməsində ümummilli liderimiz Heydər Əliyevin danılmaz fəaliyyətindən, uzaqgörən siyasətindən danışdı.
O, bildirdi ki, Ümummilli lider hakimiyyətə qayıtdıqdan sonra atəşkəsə nail olması, dünyanın aparıcı ölkələri ilə neft strategiyasının əsasını qoyan “Əsrin müqaviləsi”nin imzalanması, ölkəmizin beynəlxalq aləmdə nüfuzunun artması, müstəqil dövlətin ilk Konstitusiyasının qəbul olunmasında, 1992-ci ildə YAP-ın yaranmasında H.Əliyevin müstəsna rolu olmuşdur. Bu gün Heydər Əliyev kursunun layiqli davamçısı prezidentimiz cənab İlham Əliyev dövlətimizin inkişafı və çiçəklənməsi yolunda yorulmaz fəaliyyət göstərir.
Tədbirdə Ulu Öndərin həyat və fəaliyyəti ilə bağlı videoçarx nümayiş etdirilmişdir.
Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Zivər Zeynalova “Müstəqil Azərbaycan Heydər Əliyevin şah əsəridir” mövzusunda məruzə etmişdir.
Dini Qurumlarla İş Üzrə Dövlət Komitəsinin Regional şöbəsinin müdiri Əzim Rəfiyev, şəhər 2 nömrəli tam orta məktəbin direktoru Fatma Həmidova, şəhər 9 nömrəli tam orta məktəbin müəllimi Cəmil Həsənov çıxış etmişlər.
Təhsildə və idmanda uğur qazanan rayon məktəbliləri rayon İcra Hakimiyyətinin başçısı tərəfindən hədiyyələrlə təltif edilmişlər.
Sonda rayon məktəblilərinin Ulu Öndər haqqında hazırladıqları kompozisiya ilə konfrans davam etmişdir.
